100 Johr Boßelvereen „Martje-Flohrs“

Na dem all eenige Eiderstedter Boßelvereene ehrm 100. Bestahn fiern kunnen ist vunt Johr in Ketrinheerd so wiet.

Bevör ick to de Verloop vun de Boßelvereen Martje Flohrs kam much ick kort öwer unse Sagen - und Geschichtstrieke Dörp poor Wöör segen.

Martje Flohrs levte in de eerste Hälfte vunt 18. Jh. De Drinkspruch vun ehr Et gah uns wol op unse olen Dage is hüüt so bekannt as dormals. De Spruch könnt wi all goot bruuken.

So ok de beide Döschers und dat kloke Peerd Leila. In de Kark steiht dat fein restaureerte Holten Peerd. Ketrinheerd hett wat- und is wer, dorum schulln wi för unse Nakamen immer war dropp henwiesen, wi dat hier fröher so weer. Ok dat ole Heimatspill dat Boßeln gehört dorto.

Nu folgt een lütte Öwerblick. De Boßelvereen is nawiesbor vun 1908. Seker is de Spoort all veel öller, vun inwandernde Hollänner keem dat ok in Eiderstedt und Noorddüütschland. All siet fröhe Johrn weer hier de Hochburg vunt Boßeln. Bet in de hüütige Tied is de Spoort aktuell, wenn ok dör annere Spoort de Boßelie wat afflaut is. In fröhe Johrn wurr to Haupsook in de Winter dat Feldboßeln, dat sogenannte Iisboßeln dörföhrt. Mit de Tied wurr dat öwert ganze Johr utdehnt, Feldkämpfe, Standkämpfe, Priesboßeln, Landschschaftsboßeln, Pokalboßeln, Straatenboßeln und veeles mehr verdeelt sik öwert ganze Johr.

Boßeln weer fröher reine Männerspoort de Fruuns keemen blots to Ball mit. Dat Manns- und Fruunsboßeln weer all lang in ne Gang, wat mehr as Gaudi ansehn wurr, un de Fruuns meistens as Sieger herut gungen. De Tieden hebbt sik wannelt siet fast 40 Johrn sind etliche Fruunsboßelvereene aktiv dorbi.De Aktivitäten prägen noch hüüt dat Dörpsleven.1908 reep de Lehnsmann Boye Gertz de Männer ut Ketrinheerd tosomen, um een Boßelvereen to gründen. De Vereen harr blots 19 Mitglieder int glieke Johr steeg de Tall noch op 41 an. De eerste Vörstand: 1 Vörsitter Boye Gertz, Vertreter August Möller, Schriftföhrer Gustav Christian, Vertreter Richard Albers, Kasseerer Wilhelm Matz, Stellvertreter Andreas Röhe.Veele Namen sind bi de öllere Generatschon noch bekannt. Währnd de Weltkriege weer dat Boßeln fast instellt wurrn. 1921 öwernehm Boye Gertz jun. de Vereen, dorna keem Max Hansen an sien Steed.1928 wurr Dirk Johns as 1. Vörsitter wählt. Dirk Johns leitet de Vereen 42 Johr. Unkel Dirk is de Boßlers in ganz Eiderstedt und doröwer herut bekannt. GrooteAndeel harr he, dat de Leistungen vun de Boßler int Dörp beachtlich ansteegen. De Boßelvereen Martje Flohrs weer immer een Grundlag för Tosamenholt und Eenigkeit. De Vereen harr veele Mitgleeder optowiesen. Veel Glück för de Vereen, dat de Flüchtlinge ok Spoß an dat schöne Heimatspill funnen und somit de Vereen mit stabil mokten.Erich Bies de ortsansässige Koopmann brocht dat Jugendboßeln inne Gang, wat Marten Spreckelsen mit veel Erfog wieder föhrt hett.Unvergeeten blifft dat Johr 1955, na lange Tied kunn de Ketrinheerdner de Kotzenbüller mit 13 m.in ne Knee kriegn. As een Olympia Sieg wurr dorna fiert. De Sieg wurr in de Karkspillkrog mit 28 stiftete Bowlen düchtig begooten. Karl Godehardt wurr ran halt he speelt op de Fidel. De Fiererie weer fröher beten mehr, jeder harr Tied und keener muß mit Auto los. Na son harte Tour muß menigmal een vun de Mannslüüd vun Fruu un Dochter ünner de Arms greepen warrn, um seker to Huus to kamen.Hanne Witt nich to vergeeten, he weer een Original in Ketrinheerd. Wichtige Postens harr he, (1956 as Ehrenmitglied benömt ) Lange Johrn weer he de Distriktsmann. As Fahnendräger föhrt Hanne de Mannschaft an. Mit Zylinner wirkt he ok beten grötter. 1923 schulln de Ketrinheerdner gegen Tetenbüllstraat boßeln, Hanne weer Rullenleser, he harr vörn an sien Zylinner een Schild, wonehm opstunn wi mööt siegen oder starven. Fröher weer dat mit de Boßelklataasch ok nich so wat dulles. De Mannslüüd harrn nich all Boßelschoh, de mussen se afwesselnd antrecken wenn dat gornich gung denn wurr ha Söck boßelt, gev mal natte Fööt oder een Utrutscher wat nich schlimm weer. Dat natte Fell keem eerst na de Feldkampf. Ok na een Niederlag leet sick dat good fiern. Wenn dor nu mehr rut schull as gung denn wurrn je anstalten mokt ehr dat los gung, dor kunnst je meist junge Hunnen bi kriegn ehr de Mann endli sowiet weer dat he schmieten kunn. de Plünnen wurrn vunt Loller schmeeten, de Arms mussen noch optarvt warrn, notfalls wurr de Böwerbüx ok uttrucken, dormit jo nich to veel Ballast an de Rump weer. Bi de ganze Kemedy kunnt malöörn dat een Fehlwurf dorbi ruut keem. Peter Hems harr meerstens Nummer een he weer een sekere Boßler. Emil Martens jun. harr Nummer letzt, Nummer letzt steiht för Beständigkeit und Sekerheit, und doch gung mol wat scheef de Kirl leeg in e Schiet und de Boßel leeg bi em. De witte Ünnerbüx harr wat griese Klöör kregen ower lacht wurr düchti na de totale Pleite. Gev ok war betere Tieden tom Bispill in de nich so goode Tieden um 1933 weern beachtliche Priese bit Priesboßeln. Emil Martens Jun. gewunn een Kaffeeservice för 6 Personen mit Kaffeekann un Teeputt dorbi. Dat Geschürr is op Flohmärkte hitt begehrt.Weer kennt dormols een Trainingsantoch kuum een Minsch harr richtige Spoorttüüch. Ower ok in de goode Tieden passeert mol een Missgeschick, dat de Kugel mit vulle Wucht ant Heck ballert. Bi de Vereen gung dat op un daal. Niederlagen muß man hennehm. Nafolger vun Dirk Johns wurr Jann Spreckelsen. Dirk Johns wurr as Ehrenvörsitter benennt, he hett doch veel för de Vereen dahn. Fröher beheeln de Vörsittende lang ehrm Posten 22 Johr leitet Jann de Geschicke vun de Vereen. Veele Aktivitäten hett he int Leven roopen, he föhrt jährlich dat Logerfüüer op Spoortplatz dör. sowi ok dat Priesduppelkopp wat bet in de hüütige Johrn stattfinnen deit. Jann stellt sien Posten na 22 Johr to Verfögung, siet de Tied fungeert he as Ehren Vörsitter. Marten löst sien Broder na 22 Johr af, siet 1992 gung dat mit Marten an de Spitz wieder. 1996 öwernehm Harro Widderich dat Komando. Harro Widderich harr een schwore Stand, veele Boßler kunnen ut beruflichen Gründen nich mehr deelnehmen. Also dat heet dor is nich genoch Nawuchs dor , de Devise lautet junge Lüüd seht to dat jüm poor Kinner torecht kriegt de Boßelvereen bruukt dringend Nawuchs. De Tieden warrn immer schworer, um noch in de eerste Reegen mittoholn, keener kann so richtig de Verantwortung öwernehm. So sind bi de Wahl 2005 as eerste Vörsitter Marten Spreckelsen und Paul Wilke in Duppelpack as eerste Vörsittende för de Vereen toständig. De Wahl gilt för dree Johr, um dat groote hunnertjährige Fest beten aftosekern. Dat ward wiss een unvergeetene Dag. Um wat op de Been tostelln is Ketrinheerd ganz wiet vörn mit barg Ünnerstützung vun de Lüüd ut Dörp lett sick veel maken. Poor passive Boßler hebbt de Spendeerbüxen an, wat lobenswert is mit poor Schiene kann een Vereen de Kopp öwer Water holn.De hüütige Dag steiht för hunnert Johr dat mutt een Erfolg warn und blieven. Veel Vergnögen wünsch ick all un grööt mit een dreefach kräftige Lüch op.

Anita Peters